Een tiedje leden mos der weer nije petreulie aanschaft worden veur kachel ien kerk. Want het mos oons netuurliek nait zo vergoan aans dij vief male wichter dij te min eulie bie zich hadden. Dat wie op kerstoavend aain van Ten Berge’s persenail oet ber bellen mouten omdat petreulie op is.

Je waaiten het meschaain nait, mor kachel ien kerk wordt stookt op petreulie. Dat is vanof de joaren zestig van de veurige aaiw zo. Dou is der mit restauroatie een haaidelucht verwarming aanschaft dij mit petreulie stookt wordt. Vrouger zat der denk ik een tank ien grond mor tegenwoordig staait der ien ’t schuurtje’, zo aans aain van de veurgangers zee. Dit is gewoon onder ien toorn, een grode lekbak mit doar ien een vat woar ien wel vieftienhonderd kaan petreulie ken. Dij vat wordt tegenswoordig vult deur drij voaten van twijhonderd kaan der ien over te pompen. Bie ten Berge worden de voaten mit twij honderd kaan vult en din brengt Jan Willem ze mit heftruck noar t hek van kerkhof.

En din komt het grode probleem: din mouten ze nog onder ien toorn. Ze worden din omkiept, zo’n twijhonderd kilo. En over t kerkhof rolt noar onder ien toorn. Vrouger zaten der dikke iezern banden om dij voaten, mor tegenswoordig binnen ze van blik. Din kin aain klain staainje der een gat ien prikken en je hebben een miljeuramp van hier tot Tokio.

Twijhonderd kaan petreulie over t kerkhof; gain tiek of wurm dij dat redt. T gras gait dood en t lopt overaal hen. Dat mout toch aans kinnen. Mor wat kieken op onze ‘vrund’ ien Eemshoaven, Google, en je kommen vanalles tegen. Gewoon ientikken, steekkaar veur voaten van twijhonderd kaan en der komt een haile rits noar veuren woar je mor oet kaizen kinnen. Vrouger mozzen je haile enseklopedie deurspitten, mor tegenswoordeg gaait dat veul makkelker.

Zo’n kaar oetzögt, besteld en hai wer ofleverd. T Bedrief dij hom leverde het nog wel even noavroagd of dat wel de goie was, want een steekkaar veur twijhonderdkaans voaten veur een kerk vonden ze toch wel wat vremd. Heb heur oetduud woar t veur was en binnen een week wer t ding ofleverd. Reint har lege voaten der al mit noar ten Berge brocht en dat ging goud. Dou de volle nog. Dat ging ook wonderwel, zulfs over stuk gras aan t end van pad noar toren.

Wie kinnen nou eerst weer een tiedje waarm kerken. 

Jan Olthof